ਮਿਸਟਰ ਟਰੰਪ ਸ਼ੇਰ ਦੀ ਪੂੰਛ ਨਾਲ ਨਾ ਖੇਡੋ ਨਹੀਂ ਤਾਂ ਪਛਤਾਉਣਾ ਪੈ ਜਾਵੇਗਾ : ਰੂਹਾਨੀ

ਦੁਬਈ — ਈਰਾਨ ਦੇ ਰਾਸ਼ਟਰਪਤੀ ਹਸਨ ਰੂਹਾਨੀ ਨੇ ਤਹਿਰਾਨ ਵਿਰੋਧੀ ਨੀਤੀ ਅਪਣਾਉਣ ਲਈ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਚਿਤਾਵਨੀ ਦਿੱਤੀ ਹੈ। ਈਰਾਨੀ ਡਿਪਲੋਮੈਟਾਂ ਦੇ ਇਕ ਪ੍ਰੋਗਰਾਮ ‘ਚ ਐਤਵਾਰ ਨੂੰ ਰੂਹਾਨੀ ਨੇ ਕਿਹਾ, ‘ਅਮਰੀਕਾ ਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ ਈਰਾਨ ਨਾਲ ਜੰਗ ਦੇ ਨਤੀਜੇ ਅਮਰੀਕਾ ਲਈ ਬਹੁਤ ਹੀ ਬੁਰੇ ਹੋਣਗੇ। ਉਨ੍ਹਾਂ ਕਿਹਾ, ‘ਮਿਸਟਰ ਟਰੰਪ, ਸ਼ੇਰ ਦੀ ਪੂੰਛ ਨਾਲ ਨਾ ਖੇਡੋ ਨਹੀਂ ਤਾਂ ਪਛਤਾਉਣਾ ਪੈ ਜਾਵੇਗਾ।’ ਈਰਾਨ ਸ਼ਾਂਤੀ ਚਾਹੁੰਦਾ ਹੈ ਪਰ ਜੰਗ ਸ਼ੁਰੂ ਹੋਈ ਤਾਂ ਉਸ ਦੇ ਲਈ ਉਹ ਤਿਆਰ ਹੈ ਪਰ ਇਸ ਨਾਲ ਅਮਰੀਕਾ ਨੂੰ ਬਹੁਤ ਹੀ ਨੁਕਸਾਨ ਪਹੁੰਚੇਗਾ। ਤੁਸੀਂ ਉਸ ਸਥਿਤੀ ‘ਚ ਨਹੀਂ ਹੋ ਕਿ ਈਰਾਨ ਨੂੰ ਆਪਣੀ ਸੁਰੱਖਿਆ ਅਤੇ ਹਿੱਤਾਂ ਖਿਲਾਫ ਚੱਲਦੇ ਲਈ ਮਜ਼ਬੂਰ ਕਰ ਸਕੋ।’ ਰੂਹਾਨੀ ਦਾ ਬਿਆਨ ਮੀਡੀਆ ‘ਚ ਆਈਆਂ ਉਨ੍ਹਾਂ ਖਬਰਾਂ ਤੋਂ ਬਾਅਦ ਆਇਆ ਹੈ ਜਿਸ ‘ਚ ਅਮਰੀਕਾ ਵੱਲੋਂ ਈਰਾਨੀ ਸਰਕਾਰ ਨੂੰ ਅਸਥਿਰ ਕਰਨ ਦੀ ਗੱਲ ਕਹੀ ਗਈ ਹੈ। ਅਮਰੀਕੀ ਅਧਿਕਾਰੀਆਂ ਨੇ ਮੰਨਿਆ ਹੈ ਕਿ ਟਰੰਪ ਪ੍ਰਸ਼ਾਸਨ ਨੇ ਪ੍ਰਮਾਣੂ ਪ੍ਰੋਗਰਾਮ ਬੰਦ ਕਰਾਉਣ ਲਈ ਈਰਾਨ ‘ਤੇ ਦਬਾਅ ਵਧਾ ਦਿੱਤਾ ਹੈ। ਸਾਲ 2015 ‘ਚ ਈਰਾਨ ਨਾਲ ਪ੍ਰਮਾਣੂ ਸਮਝੌਤੇ ਤੋਂ ਅਮਰੀਕਾ ਨੇ ਇਸ ਸਾਲ ਮਈ ‘ਚ ਖੁਦ ਨੂੰ ਅਲੱਗ ਕਰ ਲਿਆ ਸੀ। ਉਹ ਨਵੀਆਂ ਸ਼ਰਤਾਂ ਨਾਲ ਪ੍ਰਮਾਣੂ ਸਮਝੌਤੇ ਲਈ ਈਰਾਨ ‘ਤੇ ਦਬਾਅ ਪਾ ਰਿਹਾ ਹੈ।